Luisa Durán "La Cigarra Extremeña"
Logrosán (Cáceres)

MIAJINAS MI CORAZÓN


Miajinas me se jaci'l corazón,
al jabla me sa ñua jata'l alma,
se jarta de suöris el mi cuerpo,
la mollera me s'a tonta
y m'arruñan las entrañas.

Soy de raza estremeña y mu de Dios,
qu'asina tós los míos m'endirgaron
y jormaron mu pa'entru mis querencias,
al icilme de la jonra,
los ejuerzos y el trebajo.

De röiya me jinco pa peil,
con tuito'l mi caletre y la mi casta:
¡señó, no te orvíes de mi Estremadura!
¡La más güena, la más nobli,
y es mu dina d'ayuala!

A tós sus ijos los tieni esparcíos,
dejaron sus jacienda una mañana,
pa ganalsi'l coscurro p'otros laos,
y tós jimplan pol tenella
y tós jimplan al dejalla.

Manque semos más juertis que los jierros
p'embucal desazonis que mus matan,
adentro se mus jacin garrabuños,
que tuítus la queremus mucho
y cuasi naide pué orvialla.

Dendi lejus soñamus con tenella,
con los nuestros bracinos abrazalla,
acabal con tuítas las desazonis:
pa jacé tós mu juntinos
una tierra d'esperanza.

And'l sol mus alumbre a tós lo mesmu,
aiga brega pa toa la labranza,
n'acotinen los campos tós posíos,
que mus cante la perdiz,
y ascuchemus la chicharra.

Sementera. Nrs. 29 - 30. Diciembre de 1998.