MARÍA JOSÉ MATEOS POMBERO

BADAJOZ

 COMO UNA ZAGALA ENAMORÁ

Como a una zagala nueva,
cuandu güervo la caëza,
son las mirás de tus ojos
las mirás qu’a mí m’alegran
y me voy trás d’ellas
como una zagala enamorá.
Van refalandu los días
y me paece mentira
que yo a tí tanto te pueá queré.
Van refalando las joras,
suspirandu pá que güervas a mí vera,
p’estar dambos mu juntitos,
a la vera de la encina vieja,
pá qu’esas querencias tan jondas
enciendan la llama ardienti
con cálidu mantu d’estrellas
y bañus de luna llena.
¿Qué m’has dao?

Pá arrancarti endispués
de tus labios un besu
con saból a jaras y a tomillu.
¿Qué m’has dao?
que tu piel me güele a romero en flol.
¿Qué m’has dao?
Pá tenerte estos quereles tan jondos.
Yo sé qu’el cariñu tuyo
cariñu mu jondo es,

pá llenami de delicaëzas,
pá secame el llanto de mis ojos,
pá dame esa juerza tuya
que tan drento llevas
y loquita me güerves,
como una zagala enamorá,
con tu risina pícara
cuando al oídu me ices, María,
qué mimosina t’as güerto
y qué bonita estás...

Foro de APLEx 7/12/2004 14:21

SALIR