Pablo Muñoz Regadera
12 setiembri 2004

El Torno

L'han dau una medaya a títulu póhtumu a l'ehcritora Dulce Chacón en la Junta d'Ehtremaura pol luh suh muchuh mérituh literariuh y humanuh.
Endi El Torno, pueblu en'el qui reposan lah suh cenizah por'expresu deseu suyu, moh queremuh sumal a ehti homenaji y comu sabéih, tamién compongu angunuh velsuh y m'an salíu luh que uh endilgu aquí abajinu:

Iríah a la sierra,
A ondeá ayí tu melena negra,
A regal la tierra con lah tuh venah.

El caminu’e la sierra

Sí, ibah a la sierra,
Te vi ajorrá endi la cayeja,
La yegua que montabah
Era primeriza y nobli,
Comu’na primavera.

Ibah a buhcal•luh
A luh chozuh, a lah cuevah,
A luh corazonih dulmíuh
A la sombra de la’ihtoria.

Y velayili ehtaban luh cabreruh
Y arzaban la cayá:

¡Por’ayí, por’ayí arribina
Ehtaban ehcondíuh!
Pregúntali a Vitoria
que anda endurzandu la zurrapa
pa tupil•luh bien tupíuh,
polqui pasan mucha jambri
y tienin luh pieh engurdíuh.

Ayí mehmu,
Al lainu la choza’e piedra
Vihtih a Vitoria,
La rica miel y la memoria,
Y ehtaban con’eya luh cabreruh de la sierra:
Tíu Adolfo el Cayau pa el robleu,
Venancio en lah’Erah Jondah,
Adolfo Izquierdu y la Morena,
Tamién luh Chilinih…
y luh lobuh y lah fierah.


Dulce

Oyi, si luh véh diluh que la libertáh eh sagrá,
Que no s’abajin pa ná de lah majáh,
Que hay camaleonih ajechandu
Entri lah majanerah’e piedra.


La Rica Miel

Si, sí, yo luh vi el’otru día,
Aquí mehmu, al lainu la juenti,
Cantaba y jacía el quesu
¡menudu suhtu me dierun!
Y luh tupí bien tupíuh de suero y jiguh secuh
Y eyuh bien m’agraecierun.
Y al’otru día que vinierun
Matamuh unuh guarrapinuh,
Malandarih al dehteti,
que’htaban mu gordinuh,
y ali,
moh luh comimuh con’eyuh
y moh luh pagarun,
eran genti mu’mildi y mu güena.

Dulce

A mi me lu’iju Pinto
y subimuh enseguía pa la sierra,
valientih,
con lah’alforjah yenah
de’ilusionih y de’ideah.
Echa un tragu vinu, Manué,
Pa rompel ehti exiliu que moh comi.

Tía Auria

Tía Auria vía cael el suero
Ehprimiju abaju,
Asín l’había veníu la conocencia,
Rehfalandu suavimenti por la sierra’e Cabezuela.
Jahta qui, a luh cuatro añuh, se reconoció a la vía
En un castañal, mirandu lah’ehtreyah:


¡Un platinu d’ avellanah
que por’el día s’ehcondin
y pol’a nochi s’ehparraman!

El suero y la zurrapa

Payí se muevi argu,
Ángel, mira a vel si son luh maluh,
Ay, que no, so tontu, que son de luh muehtruh:
Pintu,¡ qué alegría!
¡Y vieni con’el tíu Picoti!
Amuh, amuh, entral pa’entru a la majá,
Que uh vu’a tupil de sueru
Jahta que oh jimpléih bien jimplauh,
Comu luh chivinuh por lah tardih
Cuandu yegan lah cabrah en rebañu
Y se ponin luh’ociquinuh albedríauh.

Dulce

Yenaban a bolbotonih,
Con el suero,
Luh güecuh fríuh de lah balah.

Auria

Mira, mira bien arriba,
Payí ehtá el canchal de la Gama
Y la cueva de luh Maquih
Ondi no farta l’ehperanza.


Dulce

Amuh bien a prisa,
Amuh, amuh, ayí arribina,
A divisal como divisan lah’aguilah.

Auria

Tíu Ángel
anda jaciendu garipoluh
En luh prauh de la sierra,
Agora que’htán paríah lah guarrapah
Y hai tiempu pa’ordreñá lah cabrah.

Pol la nochi se metían en un caseretinu,
Ángel, Auria y Feliciano,
Y habían pasau muchu miéu.
Aqueya vej habían yegau por la nochi
Y jacía muchu friu,
Trohtearun a la puerta,
Y ayí se quearun a la lancha la lumbri
Jahta que s’abajarun lah’ehtreyah.

¡Pol San Andréh
Lah cabriyah se ponin al’amanecel!

Aluegu ya se juerun
Peru siempre ehtuvierun con musotruh
Y sino, mira agora comu vienin a la juenti
a buhcal el’agua frehca.

El cabreru’e la sierra

Si, sí, se m’aparecierun
Y me’ijerun que conmigu no’iba náa,
Que no juera usau abril’la boca,
Y siguierun el caminu
Con lah botah y lah ehcopetah a cuehta,

¡Si’ehqui cazaban conejuh y zorrah pa comel!

A l’otru día ehtaba amuyendu patatah
Y vinierun y leh di una arroba y un cuartiyu’e vinu,

¡Si ehqui tamién son jombrih
y tienin mu jonduh idealih!

Polqui mira, una guerra eh lo peol,
Y el’olvidu…, el’olvidu eh com’un fuego.

Dulce
Yo m’acueldu,
Se enfrentaban y mataban luh’ermanuh,
Amuh, amuh prehtu ayí arribina,
A avisal•luh y a querel•luh bien queríuh.

Luh rojuh

Payí arribotona,
En lu altu delah cumbrih,
Andaba Joxe Izquieldu
alró lah vacah de su agüelu,
y lu vió tóo,
Sí, sí, en’ehti mehmu pueblu,
En’el Tolnu, en la sierra,
Vió salil pal frente
A Jacintu y a tíu Pablo,
A Silvianu y a tiu Eladio,
A tíu Pelajiguh y a Ahteriu el Rata,
Y a muchuh otruh, comu hermanuh.

Y lah madrih, y luh’ijuh chequininuh,
Comu’na diminuta gota d’ehperanza.

Y vihti a Adolfo Izquierdo
Ehcondíu en lah’Erah Jondah,
Endihpuéh lu bien que s’había portau con to’er pueblu.

Peru hoy ya s’han íu,
Ya no quean en la sierra,
Solu el’ecu de lah piedrah.

Joxe

No s’han íu,no,
Ehtaban ehcondíuh en lah majanerah,
El’otru día ehtuvierun pahquí mehmu,
En’el yanu Vaquerizah,
Y cantaban y reían
Y recitaban versuh tielnuh
¡Y mu alegrih!
Polqui eyuh, eyuh son l’esencia’e la yerba güena,
De luh canchuh, de luh roblih,
de luh tiempuh venieruh.
Y tamién ehtaba eya,
Una mujer juerti, jonda y morena,
Y s’abrazaba a Pinto
Confundíuh dambuh ya en la tierra.

Dulce

Yo luh vi
Y guardu esi momentu en la sesera
Pa endihpuéh ehpal•cil•luh pol’uh’airih
Pa que tó’er mundu lu sepa.
Amuh, amuh, mi yegua primeriza,
Súbime a luh cieluh,
Pa que ajondi mih raicih
Y m’ehparza eternamente en lah Vaquerizah de la sierra.
Manué, echa lah alforjah bien repletah
Y ámunoh con Pinto que tieni la bota’e vinu yena.

Dulce Chacón

Tengu sed,
Darmi agua, darmi mucha agua,
Pa lah cabrah, pa luh chotinuh que vienin toituh luh díah a velmi,
Pa luh niñuh que juegan en la juenti nueva,
A bolindrih y a peonzah y a jacelmi caraba tierna.

Polqui tóoh m’engendran y m’aventan
Yo soy la tierra, eyuh la sementera que se riega.

Y pa que to’er mundu lu sepa,
Yo uh saqué de l’ehpesura de l’hihtoria
Y ya no oh’abandonu.
Aquí’eju el mi sembrau,
Unuh libruh y un’arbul
Y luh versus en luh labiuh.


Dulce Chacón, en las Vaquerizah pa siempri y, manqui pasi el tiempo, en luh muehtruh corazonih presenti, y en El Tolnu, Dulcimenti.

Volver